ფოტოები : სანდრო სულაბერიძე
გვანცა ჯიშკარიანი
ცეცხლი მესიზმრება
04/05/22 - 29/05/2022
The Why Not Gallery მოხარულია წარმოგიდგინოთ გვანცა ჯიშკარიანის მერვე სოლო გამოფენა ‘ცეცხლი მესიზმრება’.
ხელოვანი გალერეის სივრცეს სიზმრისეულ ლანდშაფტად აქცევს, სადაც ფაქტურები, სუნები და ჟღერადობები ერთიან სენსორულ გამოცდილებას ქმნიან და დამთვალიერებელს ფორმებსა და მატერიებში, შეგრძნებებსა და ასოციაციებში სამოგზაუროდ ეპატიჟება.
ერთის მხრივ, ჯადოსნურ სანახაობაში, მძაფრად იგრძნობა დისონანსი - გამოფენის წამყვანი ელემენტი ცეცხლია - როგორც სუბსტანცია, როგორც ენერგია, როგორც სიმბოლო და როგორც პოტენციალი. ცეცხლი ფიგურირებს თითქმის ყველა ნამუშევარში, იქნება ეს მისი გამოსახულება თუ ფიზიკური კვალი. დესტრუქციის, ძალადობის, აგრესიის, შიშის და ამასთანავე, განახლების სიმბოლოები უცნაურად სასიამოვნო სანახაობას ქმნის, თითქოს კოლექტიური ქვეცნობიერის ამოძახილია.
დღეს, როდესაც ევროპა ომის ცეცხლშია გახვეული, ძნელია გამოფენა არ დავუკავშიროთ არსებულ კონტექსტს და ერთგვარ რეფლექსიად ან წინათგრძნობადაც კი შეგვიძლია წავიკითხოთ.
გვანცა ჯიშკარიანი:
„ამ გამოფენაზე მოსული, მინდა ბილიკზე ახვიდეთ და ტყის ნაგლეჯს უყუროთ ზევიდან, როგორც ნანგრევებს, როგორც ქალაქის ზარ-ზეიმით აღმოჩენილ და დავიწყებულ გალავანს. მინდა დაბალი ხმები გაიგოთ და ცეცხლის სუნი იგრძნოთ.
ზოგი ჩახვალთ ამ ტყეში და ფრთხილად სიარულისას, გზადაგზა პატარა აღმოჩენებს გააკეთებთ. სილამაზეებს შეაგროვებთ, ისევე, როგორც მე ვაგროვე თითოეული ეს გამოსახულება ჩემი მოგონებებიდან, წიგნებიდან, დოკუმენტური ფილმებიდან, საინფორმაციო გამოშვებებიდან და სიზმრებიდან.
ქინაქინა იყოს ეს მოგზაურობა თქვენი ბევრჯერ დავიწყებული და ხანდახან გახსენებული წარსულისთვის, ადამიანებისთვის, რომლებიც მხოლოდ კადრად გვახსოვს, დამწვარი დღიურებისთვის, წაგებული ომებისთვის, არ განცდილი ბედნიერებებისთვის, და იყოს ეს დღესასწაული გახსენების უნარისთვის, ხელახლა, მრავალჯერ დაბადებისთვის და დამწვარი ფრთებით კილომეტრების ფრენისთვის.’
