ხანდახან დამშრალი შადრევნებიც ამოხეთქავენ

მარიამ აქუბარდია​

04/06/21 - 10/08/21

​

The Why Not Gallery მოხარულია მოგიწვიოთ მხატვარ მარიამ აქუბარდიას პირველ პერსონალურ გამოფენაზე
"ხანდახან დამშრალი შადრევნებიც ამოხეთქავენ"

 

გამოფენაზე წარმოდგენილი სერიის შთაგონება საბჭოთა სანატორიუმები გახდა, როგორც ერთგვარი ანთროპოლოგიური კვლევის საგანი, ფუკოსეული ჰეტეროტოპია, მაგრამ ამავდროულად ემოციურად ძალიან ახლო და მნიშვნელოვანი ხელოვანისთვის. სანატორიუმის, როგორც დასასვენებელ-გამაჯასაღებელი სივრცის კონცეფცია, მე-19 საუკუნეში ჩნდება დასავლეთში და ლოკალურ კონტექსტში განსაკუთრებულად პოპულარული საბჭოთა კავშირის დროს ხდება. არაერთი შთამბეჭდავი კომპლექსი არსებობდა საბჭოთა საქართველოში, განსაკუთრებით - აფხაზეთში, რომელიც საბჭოთა ელიტარულ საზაფხულო მიმართულებად ითვლებოდა.

​

საბჭოთა მშრომელი ადამიანისთვის განსატვირთავად აშენებული სანატორიუმები და სასტუმროები უახლეს ისტორიაში, კერძოდ აფხაზეთის კონტექსტში, აბსოლუტურად ახალ განზომილებაში გადავიდა. დღესდღეისობით პოპულარული სენტიმენტის, აფხაზეთის ‘წართმეულ განძად’ წარმოჩენის და ეგზოტიზაციისას, ყველაზე ხშირად სწორედ საბჭოთა სანატორიუმების ნანგრევების ფოტომასალა გამოიყენება. ამავდროულად, აფხაზეთიდან დევნილი ადამიანებიც, სანატორიუმებსა და სასტუმროებში გადაანაწილეს, თავიდან - დროებით დასარჩენად, მაგრამ უკვე თითქმის 30 წელია, ეს შენობები ბევრისთვის მუდმივ საცხოვრებლად გადაიქცა. მარიამის ნახატებიც ამ ამბივალენტობასა და ურთიერთგამომრიცხაობაზე თამაშობს - გამოსახული ადამიანები არიან სანატორიუმის ბედნიერი დამსვენებლები, თუ დროებითობასა და გაურკვევლობაში გაჭედილი დევნილები, რომლებიც ცდილობენ მძიმე მოცემულობაში დაიმკვიდრონ თავი და ნორმალურთან მიახლოებული ცხოვრება ააწყონ?!

​

როგორ რთულად აღიქმება დრო იქ, სადაც „დროებითობის“ კონცეპტი თავდაყირაა დაყენებული და მარადიულობადაა აღქმული? გაწელილი, გაუქმებული დრო, რომელსაც ნახატების მთავარი გმირები მოლოდინით, მონოტონური, რომანტიკული თუ დამღლელი აქტივობებით ავსებენ. ნახატები, რომელიც გაცრეცილი ფოტოსურათების კადრებს გვაგონებს - პალმებითა და აგავებით შექმნილი ტროპიკული ლანდშაფტები, ნესტის სუნით გაჯერებული ჰაერი, შუშხუნებითა და ტორტებით აღნიშნული დღესასწაულები, ყურზე მიდებულ ნიჟარებში ზღვის ხმა, ფოიერვერკები და ანთებული ასანთის ღერები, ერთი შეხედვით ლამაზი მომენტები აფეთქებებად გადაქცეული...

დასწრება თავისუფალია.

გალერეა მუშაობს ყოველდღე, ორშაბათის გარდა 12-7 საათამდე.