მალხაზ გორგაძე
გაფრთხილება
28/10/2022 -25/12/2022
'20. და თქვა ღმერთმა: გამოიღოს წყლებმა ქვეწარმავლები ცოცხალი სულით და ფრინველები, რომლებიც იფრენენ ქვეყანაზე, ცის სამყაროს შესაბამისად. და იქმნა ასე.
21. და შექმნა ღმერთმა დიდი ვეშაპები და ყოველი სული ცოცხალ ქვეწარმავალთა, რომლებიც გამოიღებს წყლებმა მათი გვარისაებრ, და ყოველი ფრთოსანი ფრინველი გვარისაებრ. და იხილა ღმერთმა, რომ კარგია.
22. და აკურთხა ისინი ღმერთმა და თქვა: აღორძინდით და გამრავლდით და აავსეთ წყლები ზღვებში, და ფრინველები გამრავლდნენ ქვეყანაზე.
23. და იქმნა მწუხრი და იქმნა განთიადი - დღე მეხუთე'
The Why Not Gallery მოხარულია მოგიწვიოთ ხელოვან მალხაზ გორგაძის მეორე პერსონალურ შოუზე, ‘გაფრთხილება’.
მალხაზ გორგაძე (დ.1941), საბჭოთა ქართული მონუმენტური ხელოვნების ყველაზე მნიშვნელოვან წარმომადგენლებს შორისაა. აღსანიშნავია, რომ ახალგაზრდობაში ხელოვანი ძირითადად მონუმენტურ რელიეფურ და მოზაიკურ პანორამებს ქმნიდა საჯარო სივრცეებისთვის და მისი ფერწერული ნამუშევრები ფართო დამთვალიერებლმა მხოლოდ ბოლო წლებში გაიცნო. საჯარო სივრცეში მრავალწლიანი მუშაობის შედეგად შეთვისებულ მონუმენტურ მასშტაბსა და აღქმას ხელოვანი თანამედროვე ხელოვნების დისკურსში თარგმნის და ქმნის ფერწერულ ტილოებს, რომელსაც არანაკლები ფიზიკურობა და ინტენსივობა ახასიათებს.
წარმოდგენილი გამოფენა თემატურად განსხვავდება ხელოვანის შემოქმედებისგან, რომელიც ძირითადად ჯადოსნურ ლანდშაფტებში განვითარებული იდილიური სცენარების გარშემო ტრიალებს და ამ მეტად ესთეტიური კომპოზიციების მეშვეობით განიხილვს ფილოსოფიურ, უნივერსალურ საკითხებს. ხელოვანის ბოლო სერია, რომელსაც სათაური „გაფრთხილება“ აერთიანებს, რეფლექსირებს უახლეს სოციო-პოლიტიკურ მოვლენებზე, იქნება ეს პანდემია, ომი რეგიონში, განადგურება თუ გაუცხოება, ყველაფერი, რამაც მოიცვა დღევანდელი საზოგადოება. სიმბოლიზმით გაჯერებული ფერწერული ტილოები ჩვენი დროის მატიანედ გვევლინება და ერთგვარ წინასწარმეტყველურ ხასიათსაც ატარებს.
