The Why Not Gallery და ბათუმის თანამედროვე ხელოვნების სივრცე მოხარულია მოგიწვიოთ ჯგუფურ გამოფენაზე All Your Favourite Bitches and Witches.

​

ექსპოზიცია დამთვალიერებელს წარმოუდგენს ქართველი ხელოვანი ქალების ახალ თაობას, განსხვავებული ხელწერითა და მუშაობის ტექნიკით. წარმოდგენილი ნამუშევრები განიხილავენ ისეთ თემებს, როგორიცაა იდენტობა, გენდერული როლები და სტერეოტიპები, პირადი ისტორიები თუ კოლექტიური მეხსიერება, მისტიციზმი და კლიშე.
​
შოკისმომგვრელი, მაგრამ მიმზიდველი, იუმორნარევი და ანცი, ვიზუალურად მიმზიდველი და თან შემზარავი - ამ ურთიერთგამომრიცხავი განცდების ერთობა არის ის მთავარი ხაზი, რაც გამოფენას გასდევს და მასში აერთიანებს სხვადასხვა ნამუშევრებს.
​
გამოფენა ერთგვარი პასუხია ზოგად მსოფლიო ტენდენციაზე, სადაც ძლიერი ქალი დაწინაურდა და თავის ადგილს იმკვიდრებს, როგორც სუბიექტი და საკუთარი თავის პატრონი. ექსპოზიცია ასევე რეფლექსირებს ლოკალურ სახელოვნებო სივრცეზე, სადაც სულ უფრო და უფრო დომინირებენ განსაკუთრებულად საინტერესო ხელოვანი ქალები. გამოფენის სათაური ერთგვარი ხუმრობაა იმ ორ წამყვან იარლიყზე, რომელსაც დამოუკიდებელ, ძლიერ ქალებს აწებებენ ხოლმე, მათი დამცირების და გარიყვის მიზნით. მათ, ვისაც საკუთარი აზრის გამოთქმის სურვილი აქვთ: ან ჯადოქრებს უწოდებენ და წვავენ, ან ძუკნებს არქმევენ და მათზე ძალადობენ. სათაური ხაზს უსვამს ამ ფიქსაციას, რომელიც თითქოს ზიზღნარევი და ნეგატიური დამოკიდებულებაა, მაგრამ სინამდვილეში, ხშირად, ძლიერი მიზიდულობით და შეპყრობილი მიჯაჭვულობითაა გამოწვეული. სინამდვილეში კი, თანამედროვე ჯადოქრებს ეს იარლიყები ვეღარ გააჩერებენ, პირიქით, ეს მათთვის ბრძოლის გაგრძელების მოტივაცია და დაბრკოლებაა, რომელსაც წამში გაანადგურებენ!
​
მონაწილე ხელოვანები: ანი გურაშვილი, ელენე ლაპიაშვილი, ქეუ მეფარიშვილი, ანა ჩადუნელი, გვანცა ჯიშკარიანი.